Monday, March 25, 2013

Cosmic latte | കോസ്മിക് ലാറ്റെ

പ്രപഞ്ചത്തിന്റെ ശരാശരി നിറത്തിന് ജോൺ ഹോപ്കിൻസ് യൂണിവേഴ്സിറ്റിയിലെ ഒരു കൂട്ടം ജ്യോതിഃശാസ്ത്രജ്ഞർ നൽകിയ പേരാണ് കോസ്മിക് ലാറ്റെ. പ്രപഞ്ചത്തിലെ എല്ലാ പ്രകാശകിരണങ്ങളുടെയും വർണ്ണരാജിയുടെ ശരാശരി മൂല്യമാണിത്. ആർ. ജി. ബി. മൂല്യം #FFF8E7 ഉള്ള ഇതിന് ഒരു പാൽകാപ്പിയുടെ നിറമാണ് അതുകൊണ്ടാണ് കോസ്മിക് ലാറ്റെ എന്ന പേര് ലഭിച്ചത്. 2001 ൽ കാൾ ഗ്ലേസ്ബ്രുക്കും, ഐവൻ ബാൽഡ്രിയും കൂടി നടത്തിയ നിറനിർണ്ണയം ഒരു വിളർത്ത പച്ചനിറമായിരുന്നു. 2002 ഇറങ്ങിയ റിസർച്ച് പേപ്പറിൽ അത് ഒരു സൊഫ്റ്റ്വെയർ ഗ്ലിച്ച് കാരണം തെറ്റിപ്പോയതാണെന്നും ശരിക്കുള്ളനിറം #FFF8E7 ആണെന്ന് അവർ അറിയിച്ചു. ഈ നിറത്തിന്റെ ഒരു സാമ്പിൾ വാഷിങ്ങ്ടൺ പോസ്റ്റ് പത്രത്തിൽ പ്രസിദ്ധീകരിച്ചു, വായനക്കാരിൽ നിന്ന് നിറത്തിന് ഇടേണ്ട പേരുകൾക്കുള്ള നിർദ്ദേശങ്ങൾ ക്ഷണിച്ചു. വായനക്കാരുടെയും ജ്യോതിഃശാസ്ത്രജ്ഞന്മാരുടെയും നിർദ്ദേശങ്ങളിൽ നിന്ന് തിരഞ്ഞെടുത്തത് പീറ്റർ ഡ്രം എന്ന ശാസ്ത്രജ്ഞന്റെ നിർദ്ദേശമായ കോസ്മിക് ലാറ്റെ ആയിരുന്നു. ഒരു ലാറ്റെ കുടിച്ചുകൊണ്ടിരുന്നപ്പോൾ പീറ്റർ ഡ്രമ്മിന് വാഷിങ്ങ്ടൺ പോസ്റ്റിൽ കണ്ട നിറവും, തന്റെ ലാറ്റെയുടെ നിറവും ഒരുപോലെയാണെന്ന് തോന്നി. ആ തോന്നലാണ് ഇങ്ങനെ ഒരു നിർദ്ദേശം മുന്നോട്ട് വയ്ക്കാൻ അദ്ദേഹത്തെ പ്രേരിപ്പിച്ചത്.

മലയാളം വിക്കിപീഡിയയിൽ നിന്നും...

Thursday, March 21, 2013

ലോകവനദിനം


വേനൽപ്പകലിൽ നടന്നു തളരുന്ന
വേദന തിന്നുന്ന മാനവർക്കായ്,
സർവ്വം സഹിക്കുന്നോരീ മരം
നൽകുന്നോരീ തണൽ പോലുമമൃതമല്ലോ!

ഇന്ന് ലോകവനദിനം 
മരങ്ങളെ സ്നേഹിക്കുന്ന
പ്രകൃതിയെ സ്നേഹിക്കുന്ന നല്ലവരായ കൂട്ടുകാരെ ആദരവോടെ സ്മരിക്കുന്നു!! 

Wednesday, March 06, 2013

വിക്കിപീഡിയയിൽ തിരുത്തൽ യജ്ഞം

അന്താരാഷ്ട്ര വനിതാദിനമായ മാർച്ച് 8 നോടനുബന്ധിച്ച് സ്ത്രീ വിക്കിമീഡിയർ മലയാളം വിക്കിപീഡിയയിൽ 'വനിതാദിന തിരുത്തൽ യജ്ഞം' നടത്തുന്നു. മാർച്ച് 1 മുതൽ 31 വരെയുള്ള ഒരു മാസമാണ് തിരുത്തൽ യജ്ഞം നടക്കുക. മലയാളം വിക്കിപീഡിയയിൽ സ്ത്രീകളെ സംബന്ധിച്ച ലേഖനങ്ങൾ വികസിപ്പിക്കുകയും, സ്ത്രീ ഉപയോക്താക്കളെ വിക്കിമീഡിയ സംരംഭങ്ങളിലേക്ക് ആകർഷിക്കുകയുമാണ് ഈ തിരുത്തൽ യജ്ഞത്തിന്റെ ഉദ്ദേശം.

സ്ത്രീകളെക്കുറിച്ച് എഴുതപ്പെടേണ്ട ലേഖനങ്ങൾ നാമനിർദ്ദേശം ചെയ്തും, ലേഖനങ്ങൾ തിരുത്തിയും, യജ്ഞത്തിൽ പങ്കെടുക്കുന്ന പുതിയ ഉപയോക്താക്കളെ തിരുത്താൻ സഹായിച്ചും മലയാളം വിക്കിപീഡിയയിൽ ഉപയോക്താക്കളായ ആർക്കും ഈ തിരുത്തൽ യജ്ഞത്തിൽ പങ്കുചേരാവുന്നതാണ്.

വിക്കിമീഡിയരല്ലാത്ത, എന്നാൽ വിക്കിപീഡിയയിൽ എഴുതാൻ താല്പര്യമുള്ള നിങ്ങളുടെ സുഹൃത്തുക്കളെ (പ്രത്യേകിച്ചും സ്ത്രീസുഹൃത്തുക്കളെ) തിരുത്തൽ യജ്ഞത്തിൽ പങ്കെടുക്കാനായി ക്ഷണിക്കുമല്ലോ. വിശദാംശങ്ങൾ ഇവിടെ കൊടുത്തിരിക്കുന്നു.

ചില തെരഞ്ഞെടുത്ത ലേഖനങ്ങൾ

ആസുരതാളങ്ങൾക്കൊരാമുഖം - ചായില്യം.കോം
The text content of this site are available under the Creative Commons Attribution-ShareAlike License